O Pazo de Mos acolleu este xoves un novo faladoiro do programa provincial Aquí Faltan Páxinas, promovido pola Deputación de Pontevedra para divulgar a traxectoria de mulleres galegas relevantes que permaneceron durante décadas nun segundo plano dos relatos históricos e culturais.
A sesión estivo dedicada á figura de Corona González Santos, vinculada a Mos e ao Porriño, e recoñecida como unha pioneira da fotografía afeccionada en Galicia e unha muller comprometida con distintas iniciativas culturais e sociais do seu tempo.
No acto participaron a deputada delegada de Igualdade e Benestar Social, Paula Bouzós Barros, e o concelleiro Leo Costas, quen destacou “a importancia de recuperar referentes femininos que contribuíron á vida cultural e social de Galicia desde ámbitos moi diversos”.
Durante a súa intervención, o concelleiro subliñou tamén o valor histórico e documental do arquivo fotográfico de Corona González Santos, composto por imaxes da vida cotiá de comezos do século XX e conservado parcialmente no Museo de Pontevedra.
O faladoiro permitiu achegar ao público a traxectoria persoal e cultural dunha muller que desenvolveu a súa actividade nun contexto no que a presenza feminina nos espazos artísticos e públicos era moi reducida, contribuíndo así á recuperación dunha figura pouco coñecida da historia galega contemporánea.
A iniciativa enmárcase no programa Aquí Faltan Páxinas, impulsado pola Deputación de Pontevedra co obxectivo de visibilizar e poñer en valor o papel das mulleres na historia, na cultura e na sociedade galega.
