Laura Castro, concelleira de igualdade de A Illa de Arousa presenta a programación e o cartaz arredor deste próximo 8 de marzo, día da muller traballadora.
Comezamos con un obradoiro de xoguetes e intelixencia emocional dirixido a nenas e nenos de entre 3 e 12 anos.
O propio día 8 de marzo faremos a lectura do manifesto ás portas do concello e pola tarde pasaremos a facer a inauguración do troco de nome dos Xardíns de Goday que pasarán a ser “Xardín traballadoras da conserva” visto que existen dúas zonas chamadas xardíns de Goday, pretendemos cambiarlle o nome para diferencialas e poñer en valor o traballo que fixeron nesa zona as traballadoras da conserva que estaban empregadas na fábrica.
Pensamos dende esta Concellería que o día máis axeitado para a inauguración sería o 8 de marzo, día da muller traballadora polo seu significado e simbolismo, asegurando que o novo nome proposto para os xardíns é o máis apropiado e ten relevancia histórica, cultural e outros significados importantes para a comunidade.
Existe unha desproporción de xénero no nome das rúas e prazas que ven moi de lonxe, deixando pouca visibilidade para as mulleres, ademais da dicotomía entre o público e o privado que rexe os roles de xénero, xa que mentres que os papeis públicos da sociedade foron tomados case sempre polos homes, a esfera privada da vida como o fogar foi territorio feminino.
Consideramos que os nomes das rúas son unha ferramenta importante para que a nosa vila poida recoñecer a aquelas persoas que o merecen dunha maneira visible, formúlase a presente proposta.
Despois teremos o concerto de Lidia Luna e Ugía Pedreira con entrada libre no museo da conserva “Cantos da balea norte” Música, poesía, narrativa e ecoloxía
Lidia e Ugia propoñen un ferrado de oralidade, unha conversación tecida con cantos e contos entre elas e o público. Como fíos condutores, a paixón polo mar, a profundidade e a sinxeleza das emocións esenciais, a forte inspiración da natureza salvaxe de ambas, o culto ás baleas coas que comparten unha senda común mimetizándose imaxinariamente na súa dor e afouteza. Este diálogo, a lume lento, é unha volta á etimoloxía antiga da palabra entretemento como exposición das entrañas.
Contos propios e alleos de Lidia, cancións orixinais de Ugia, creacións e recoleccións para un espazo común no que ambas calzan as zapatillas de casa, visten as súas chaquetas de lá e adéntranse “ao mar dos latidos ditos a media voz”. Este verso de Inmaculada Mengibar irá acompañado con outros textos de Luisa Castro, Natalia Alonso, Marilar Aleixandre o Gabriel García Márquez.
Pola noite, ás 22h, teremos unha velada nocturna xuvenil con dinámicas de grupo sobre igualdade, xogos e audiovisuais para que poidamos reflexionar en grupo á vez que pasamos unhas horas divertidas.
Por último o sábado 9, proxectaremos no auditorio municipal “Thelma and Louise” no auditorio municipal.
