Máis de 240 escolares do concello de Soutomaior participarán na primeira edición dos Xogos da Lingua que se celebrarán o 21 de maio no municipio. Unha actividade de intercentros educativos onde se correrá en relevo pola lingua seguindo un formato de xogos olímpicos. Unha proba que comezará en Salgueirón, relevo no IES Soutomaior e chegada a Talo para participar na gran festa das letras amenizada cun espectáculo especial do paiaso Peter Punk.
O concello de Soutomaior deu a coñecer hoxe o amplo abano de actividades que teñen programadas para este maio das Letras. Entre elas, unha das máis destacadas e principal novidade deste ano son os Xogos da Lingua. Unha actividade que terá lugar o 21 de maio e que ten como obxectivo amosar, a través do relevo, a importancia de falar a nosa lingua, o galego, a importancia de transmitir e do relevo xeracional do noso idioma.
O inicio deste Xogos da Lingua terá lugar o 21 de maio ás 9:30 h. da mañá onde, en Salgueirón, se concentrarán as e os participantes desta proba da Escola de Educación Infantil de Romariz e do Colexio Santiago Apóstol. Ás 10:00 h. partirán de Salgueirón cunha antorcha/facho, ata o seguinte centro e así sucesivamente para completar as probas cunha metodoloxía de xogos olímpicos. A seguinte parada será ás 10:15 h. no IES Soutomaior onde lle darán a antorcha a ese centro e xuntos pecorrerán as rúas de Arcade ata chegar a Talo Río.
Durante o percorrido, onde irán correndo e andando, haberá múltiples xogos e probas, onde as e os participantes terán que ir recadando os premios de cada unha destas probas que serán pezas dun quebracabezas moi especial que unirán á súa chegada a Talo Río dando como resultado unha imaxe da homenaxeada neste 17 de maio, a escritora Luísa Villalta.
A chegada a Talo Río nesa xornada está prevista sobre media mañá, ás 12:00 h., alí as e os participantes recibirán unha chapa conmemorativa pola súa participación nos Xogos da Lingua e poderán degustar a súa merenda desfrutando do espectáculo ESPECIAL CON LINGUA PROPIA do paiaso Peter Punk.
Esta é sen dúbida a principal novidade desta edición da programación das Letras Galegas en Soutomaior, nun mes onde haberá múltiples actividades entre as que destaca: Lectura dramatizada + Taller de escritura creativa sobre Rosalía de Castro e Luísa Villalta de Trémola Teatro, unha cita que terá lugar o 15 de maio na Biblioteca Luís Seoane. O xoves 16 de maio ás 21:00h. chegará ao Multiusos “Deadpan Karaoke” de Ibuprofeno teatro. O domingo 19 o protagonista será o teatro con música en directo ‘Supercoroza. Na eira e na lareira’ de Xanela do Maxin, unha cita que terá lugar ás 18:00 h. na Casa da Cultura Rexina Míguez Doval. O sábado 25 de maio ás 21:00 h. chegará ao Multiusos “Made in Galicia” de Sechu Sende e o mércores 29 de maio a programación das letras pecharase cos Contacontos en verso con Yolanda Castaño, unha cita que terá lugar ás 18:00h. na Biblioteca Luís Seoane.
Todos estes obradoiros e espectáculos serán de balde, ata completar o aforo. Para máis información poden consultar a Axenda Municipal do concello de Sotomaior en: https://www.soutomaior.gal/wp-content/uploads/2024/04/Axenda-Municipal.pdf
