O concello de Soutomaior avanza na limpeza de camiños e beirarrúas do concello. Nas vindeiras semanas uniranse 9 operarios máis a este operativo que fará que “Soutomaior conte con máis persoas ca nunca na limpeza, desbroce e coidado do noso concello”.
O operativo de limpeza estivo hoxe no barrio de Comboa, tamén en Sameán, na Devesa e en Alxán. Tamén estiveron presentes xa en Romariz, O Val, Lourido, A devesa, Arcade de Riba, nos parques infantís e as zonas de baño da Veiguiña Longa e a Xunqueira de Arcade. Con todo, a limpeza do concello de Soutomaior continúa nestes días de maneira intensa , un sistema que foi posible grazas á contratación de persoal que se fixo no concello nas últimas semanas.
Ademais deste persoal, Soutomaior agarda incorporar ao operativo de limpeza o camión de desbroce e unha nova contratación de 9 operarios que se efectivizará nas vindeiras semanas.
Manu Lourenzo, alcalde de Soutomaior, ten claro que “traballamos para que o concello poida estar na mellor das condicións posibles e por iso apostamos por facer un esforzo na contratación de persoal para que, en Soutomaior, teñamos máis persoas que nunca na limpeza, desbroce e coidado do noso concello. É unha aposta que traerá unha mellora importante e que nos axudará a mellorar no control da maleza que con este tempo, e velocidade de crecemento, sabemos que non é unha tarefa doada”.
Dende o concello solicitan á Xunta de Galicia e á Deputación de Pontevedra que se fagan cargo da limpeza e acondicionamento das rúas que dependen destas administracións públicas, para así e deste xeito, que a veciñanza poida desfrutar do concello no mellor estado.
O proceso de desbroce en Soutomaior terá un operativo especial entre os meses de maio e outubro no que contará con máis de 20 persoas na rúa para labores de desbroce e de limpeza. O obxectivo é claro, “ter o concello na mellor das condicións posibles”.
Neste sentido o alcalde pediu colaboración á veciñanza para que entre todas e todos poidamos ter o concello no mellor estados, Manu Lourenzo trasladou á veciñanza que “non se pode limpar todo o concello nunha semana, pero este operativo chegará a todos os barrios do concello e terá máis presenza ca nunca”.
