BNG de Sanxenxo advirte de que as consecuencias da política de cemento do señor Martín “xa nos afecta ao peto de toda a veciñanza”, coa suba aplicada ao imposto de vehículos
Os nacionalistas salientan o traballo feito desde a oposición, con “propostas en positivo” e accións que serviron para frear o ‘decretazo’ que o Partido Popular quixo impulsar para cobrar vados con carácter retroactivo “e pola porta de atrás”
O grupo municipal do Bloque Nacionalista Galego de Sanxenxo define como “nefasto” o primeiro ano de Goberno de Telmo Martín. Doce meses nos que, ademais das deficiencias que presentan varias infraestruturas e o mal funcionamento de distintos servizos (especialmente no rural), consolídanse “máis impostos, con máis custes para a veciñanza; máis sentenzas urbanísticas desfarovables e un incremento de soldos para o Partido Popular”. Así de rotundo se amosa o voceiro do BNG, Fran Leiro, cando fai balanzo da xestión do Goberno local desde que revalidou a súa maioría absoluta. “As consecuencias da política de cemento e formigón do señor Martín son evidentes e están á vista de todos. A día de hoxe temos uns impostos máis altos, con subas ás que os veciños e veciñas de Sanxenxo xa estamos a facer fronte. Atopámonos tamén cunha resolución xudicial desfavorable sobre os terreos das Cunchas, que traerá como consecuencia o pago total de 15 millóns de euros e todo pola inoperancia e a incapacidade de xestión do señor Telmo Martín”, advertiu.
Con respecto aos impostos, desde o BNG alertan de que xa nas últimas semanas están a chegar desde o ORAL os recibos do Imposto de Vehículos de Tracción Mecánica (IVTM), nos que xa se aplican a suba aprobada polo Goberno do Partido Popular. “Estamos a falar dun incremento importante que nos afecta ao peto dos
veciños e veciñas”, avisa Fran Leiro, que lembra que isto só e é o comezo, porque nos vindeiros meses tamén entrará o novo recibo do Imposto de Bens Inmobles (IBI), outra das taxas incrementadas por Telmo Martín “para poder facer fronte á sentenza das Cunchas e cubrir ese 20% de aumento de soldos dos membros do Goberno local. A costa do esforzo da cidadanía”. Todo isto agravado polas mentiras do alcalde, que en campaña electoral prometeu unha baixada de impostos. “Non necesitou máis ca uns meses para deixar claro o que vale a súa palabra”, engade Leiro.
Para os nacionalistas é moi grave o feito de que estes aumentos non se traduzan nuns mellores servizos e actuacións que sirvan para mellorar a calidade de vida da veciñanza de Sanxenxo. “Máis ben ao contrario”, lamenta Leiro, que recorda as deficiencias detectadas en diferentes equipamentos e infraestruturas municipais, ás cales “aínda non se lle deron arranxo, a pesar das promesas do Goberno local”. Ademais, o voceiro do BNG sinala que “moita xente, especialmente do rural, nos traslada as súas queixas e preocupación pola falta de limpeza e de mantemento. Achégase o verán e o señor Martín só ten tempo para pensar en bandeiras azuis e en ter conexión wifi na praia de Silgar”.
Por último, desde o Bloque fan unha valoración positiva do traballo que se está a realizar desde a oposición. Ademais de facerse eco e dar traslado das inquedanzas e preocupacións de veciñanza, o BNG salienta a campaña informativa efectuada entre os meses de decembro e xaneiro, que freou o ‘decretazo’ que o señor Telmo Martín comezara a aplicar “pola porta de atrás” cos vados, esixindo un pago, con carácter retroactivo desde 2020, que non viña estipulado na ordenanza. Asemade, os nacionalistas facilitaron, coas súas propostas en positivo, que se dese resposta a necesidades como a dotación dun Aula de Estudo. “No pleno municipal o señor Martín chegou a burlarse da nosa demanda dicindo que non era necesaria unha Aula de Estudo, que quen quixese podían ir a estudar ao salón de plenos. Agora demostrouse a súa necesidade e mesmo tiveron que ampliar horarios. Seguiremos vixiantes para evitar que a política de formigón, cemento e ladrillo de Telmo Martín deixe hipotecado ao Concello de Sanxenxo e ás futuras Corporacións”, conclúe Fran Leiro.
