O Ciclo Mestre Mateo promove a presentación desta filme nos concellos de Poio, Forcarei, Redondela, Cambados e Ponteareas os días 12, 18 e 19 de novembro
O Ciclo Mestre Mateo, que promoven conxuntamente a Academia Galega do Audiovisual e a Deputación de Pontevedra, celebrará o días 12, 18 e 19 de novembro as proxeccións da súa sétima sesión coa presentación nos concellos de Cambados, Poio, Forcarei, Redondela e Ponteareas da película Tres, galardoada nos XX Premios Mestre Mateo como mellor longametraxe, mellor interpretación feminina de reparto con Marta Nieto e mellor son. Por outra banda, este filme tamén optaba a outros premios como mellor dirección de arte, mellor dirección de produción e mellor guión.
A proxección de Tres terá lugar este sábado 12 de novembro ás 20:00h no Auditorio Municipal da Xuventude de Cambados, o día 18 as 21:00h no Centro Cultural Xaime Illa Couto de Poio. Día 19 será en 3 concellos: ás 18:00h no Multiusos de Soutelo de Montes de Forcarei, ás 19:30h no Multiusos da Xunqueira de Redondela e ás 20:00h, na Sala Multiusos do Auditorio Municipal de Ponteareas.
Tres, dirixida por Juanjo Giménez é un thriller psicolóxico que conta a historia de “C” unha deseñadora de son de mediana idade que goza co seu traballo. Pasa moitas horas soa, gravando efectos sala, wild-tracks, editando, mesturando no estudo, que é o seu último refuxio: un lugar onde postergar as avariadas relacións que mantén coa súa ex parella, coa súa anciá nai e cos seus compañeiros de traballo. Aínda que ela non o sabe, está comezando a desincronizarse. Coma se fose unha película mal sonorizada, o seu cerebro comeza a procesar o son máis tarde que as imaxes. Coa ameaza de poder perder o seu traballo, este problema termina de poñer a súa vida do revés.
O ciclo, que busca dotar ós concellos dunha programación estable de cinema en galego, leva exhibindo durante o ano o resto das películas premiadas e finalistas de 2022, (O gran camiño, A virxe roxa, A poeta analfabeta, Welcome to ma maison, Cuñados e Malencolía) polo que aínda queda por proxectarse a última das finalistas a mellor longametraxe, Jacinto .
