• O alcalde Jorge Cubela confirmou que xa rematou o proceso de contratación e licitación pública dunha empresa que, baixo control dun arqueólogo, intervirá nas estacións de Laxe dos Cebros, Pedra das Ferraduras, Laxe das Rodas e Portela da Laxe
O Concello de Cerdedo-Cotobade acaba de rematar co proceso de licitación e contratación pública dunha empresa que, baixo supervisión dun arqueólogo, levará a cabo traballos de limpeza, restauración e posta en valor de varios petróglifos entre os que está o de Fentáns que sufrira no mes de abril un grave atentado.
Esta actuación levarase a cabo graza a un convenio asinado entre o Concello de Cerdedo-Cotobade e a Consellería de Cultura, Educación, Formación Profesional e Universidades polo cal a Xunta aportará uns 30.000 euros destinados a preservar e poñer en valor os petróglifos de Laxe dos Cebros, Pedra das Ferraduras, Laxe das Rodas e Portela da Laxe.
O feito de que o val medio do río Lérez, no concello de Cerdedo-Cotobade, sexa o lugar de maior concentración de petróglifos de Galicia serviu de base para asinar este acordo que permitirá intervir e preservar estes bens de interese cultural, declarados monumentos histórico-artísticos de carácter nacional desde o ano 1974.
Os traballos que realizará a empresa adxudicataria do contrato público consistirán na conservación e restauración das estacións de arte rupestre a través da limpeza e roza do entorno inmediato, baixo control arqueolóxico, para favorecer a súa visibilidade, colocación e reposición de peches perimetrais, realización dunha diagnose do estado de conservación e labores de limpeza, consolidación e restauración dos soportes gravados dos petróglifos.
Tamén se aproveitarán estas intervencións para realizar traballos de documentación e rexistro dos petróglifos mediante o seu levantamento foogramétrico e realización de fotografías nocturnas e tamén toma de imaxes e vídeo aéreo.
Outra parte dos traballos a realizar e que contempla este convenio asinado entre a Xunta e o Concello de Cerdedo-Cotobade consisten na colocación e/ou reposición da sinaléctica, divulgación nas redes sociais destes elementos da arte rupestre, organización de visitas guiadas e charlas informativas sobre os petróglifos.