Vilagarcía merece impulsar o seu potencial turístico da man dun consorcio que sume a participación do concello coa empresarial e doutras institucións
O candidato do BNG á Alcaldía de Vilagarcía, Xabier Rodríguez Paz, diante do repto turístico e do seu potencial económico considera que “o turismo representa una parte moi acentuada da xeración de riqueza local e do noso emprego. É unha actividade de negocio mercantil que produce cada vez máis retorno económico no territorio. Unha política turística responsábel debe coñecer e manexar datos e fixar obxectivos. Saber o que o turismo pode dar mais tamén desde que punto o turismo quita”.
Precisamos modelos turísticos responsábeis, ordenados e pactados socialmente, capaces de xerar emprego mais que non lastren en favor das economías sectoriais as precarias economías municipais nin cargas que non se poden asumir pola poboación residente.
O turismo é economía, e como tal debe pactarse cos sectores implicados, mais tamén debe formar parte transversalmente das políticas municipais, para planificar as oportunidades mais tamén as solucións aos problemas que a actividade turística causa habitualmente.
A sustentabilidade, a calidade en destino, a protección do medio e do patrimonio, a promoción dos valores culturais, a economía circular e a xeración de oportunidades laborais de calidade para a poboación residente deben ser os eixos fundamentais nos que organizar unha oferta diversa e diferenciada da de outros lugares, que axude a equilibrar o territorio.
Por iso, Vilagarcía merece unha política turística que poña en valor todo o potencial que aporta a súa privilexiada situación territorial, o medio natural e os equipamentos ou as súas infraestruturas como núcleo de habitantes máis extenso dunha comarca que é referente na calidade do turismo actual. Aínda así, cabe moito percorrido á hora de ampliar actividade e negocio no que debe ir da man o impulso público e a iniciativa privada que se beneficia del de xeito directo. Para iso, é necesario crear un ente participativo, un consorcio como figura xurídica que pode promoverse baixo a marca TurVilagarcía, ou a que resulte máis axeitada, na que sería xusto que, ás asociación representativas do empresariado local e á do concello, se sumasen as que operan no ámbito provincial (Turismo Rías Baixas) e galego.
Un plan estratéxico debería contemplar a comercializar de forma especializada os produtos turísticos nos mercados de demanda, afianzando e xerando unha dinámica permanente de comercialización mediante a creación de ofertas diversificadas; así como permanentemente procurar dotar de contexto á oferta turística e patrimonial como parte da rica cultura galega.
Obviamente, no medio natural, as praias teñen un papel importante, malia que poñen foco estacional no uso, porén estas necesitan de preservación e coidado perante todo o ano de xeito que non diminúa a volume da súa area (Campanario-Bamio e Preguntoiro-Vilaxoán), se complete o plan anunciado de erradicación do “cadillo” (Compostela) e se incorporen outros pequenos recunchos que precisan ser acondicionados (Pedra do Pico, Bamio).
Así e todo, no ámbito medio ambiental está un poderoso sistema de creación de novos espazos de lecer para a cidadanía; e por extensión, de oferta para o turismo de natureza e de sendeirismo que cubre as épocas de máis baixa demanda, con intervencións que representan costos moi baixos ou permiten incorporar a programas de subvención pública:
✓ A senda peonil que debe completar o percorrido entre Vilaxoán e a enseada de O Rial.
✓ A senda peonil pola beira do río Ulla que debería enlazar coa prevista polo de Catoira.
✓ Una senda peonil que percorra a canle do Río Con, en todo o seu tramo posíbel.
✓ Un proxecto que configure unha potente área natural e de lecer, unindo nunha relación de continuidade temática ao Encoro do Río Con (Castrogudín) coa ruta pola beira do río ata o Espazo natural de Fontefría e o futuro Parque de Arte Rupestre do Monte Xiabre; incluído a posibilidade de construír “pasadizos” para algún tramo.
✓ O deseño dunha proposta de Parque EtnoNatural que amplíe o actual Parte da Coca coa recuperación e posta en uso lúdico e pedagóxico do conxunto de Muíños da Laxe que aínda poden ser restaurados creando un potente centro de interese didáctico.
✓ Posta en valor, coa recuperación dos (10) Muíños de Bamio e creación de ruta.
✓ Reordenación do espazo territorial que comparten o Parque E. Valdés Bermejo (Botánico), o do Castro Alobre (incluído o xacemento arqueolóxico) e a futura
intervención que debe realizar nas parcela da rúa Valle-Inclán para unificar proposta de usos didácticos, unha vez sexa restaurado á súa necesaria situación de usos.
Aínda máis, Vilagarcía debería mirar ao potencial que representa unha futura incorporación ao uso público da área formada pola Lagoa de Comboa e o seu entorno de valor patrimonial; e tamén a posibilidade de adquirir a finca e casona da chamada Mansión dos Duques de Terranova, con 37000 metros cadrados dun bosque singular, base para un macro-parque.
A sustentabilidade ambiental supón o compromiso da presente xeración cara a xeracións vindeiras, xorde de asumir a responsabilidade en que o patrimonio natural, as paisaxes, os territorios e o medio sexan respectados, protexidos e preservados. Favorecer a combinación de usos, a rexeneración de espazos degradados limitando así a perda de ecosistemas e os seus servizos. Impulsar unha ordenación territorial intelixente que prime maiores densidades de poboación e potencie a combinación de usos, coa rexeneración do solo.
