“Non caben posíbeis malas interpretacións da frase ‘me paso a las indias por la piedra’ que, sen lugar a dúbidas banaliza o sexo humillante e a violación”, afirma.
No día onte, o BNG da Estrada, e concretamente o seu candidato Xoán Reices, recibiu un comunicado do mánager do grupo musical “Zapato Veloz”, o Sr. Juan Miguel Osuna.
No comunicado, o mánager do grupo musical, cuxas pezas musicais amenizaban unha das atraccións pagadas polo concello da Estrada, emitía duras acusacións e descalificación contra o candidato nacionalista, Xoán Reices.
O candidato do BNG afirmou que “o tono no que está escrito o comunicado do mánager de “Zapato Veloz”, con numerosas faltas de respecto á miña persoa, é clarificador sobre a falta de capacidade argumentativa de quen o escribe”. “Non imos entrar a valorar estas faltas de respecto, pois pensamos que é totalmente irrelevante darlle resposta a esta cuestión”, engade.
Xoán Reices indicou que non “entraba a a valorar o estilo musical da canción, senón o contido das actividades levadas a cabo con cartos públicos, especialmente se están destinados aos máis cativos, aos nenos e ás nenas.” “E neste sentido”, engade, “non é de recibo que con cartos públicos se fomente o machismo precisamente entre os nenos e as nenas”.
O candidato nacionalista explico que “non caben posíbeis malas interpretacións da frase ‘me paso a las indias por la piedra’ que, sen lugar a dúbidas banaliza o sexo humillante e a violación. Neste caso, ademais, tendo en conta a historia de exterminio que se levou a cabo precisamente sobre os pobos de América, o caso é aínda máis sangrante”.
Xoán Reices reafírmase no dito a semana pasada, “entendemos que unha canción que fala de ‘pasar a las indias (mulleres) por la piedra’, é unha canción machista e non é axeitada para o público infantil; nin hoxe nin hai 30 anos, e pedimos a retirada do repertorio da atracción do concello”. “Este tipo de letras son vergoñentas”, engade.
Por outra parte, o candidato do BNG explicou que “se até hoxe ninguén elevara a voz sobre o contido desta canción, que asenta a idea da cultura da violación das mulleres, di moito do traballo que aínda queda por facer para termos unha sociedade igualitaria e respectuosa”.
“Afortunadamente”, engade “a sociedade galega mudou e avanzou moito e vanse dando pasos cara este obxectivo. E neste sentido, é clave fomentar entre as capas máis novas da nosa sociedade valores de igualdade e respecto, que desde logo non aparecen reflectidos nas estrofas desta canción.”
Apoio do BNG
A polémica co grupo “Zapato Veloz” na que se viu implicado o candidato do BNG, Xoán Reices, suscitou o apoio a través das redes de Montse Prado (https://twitter.com/montseprado/status/1610006038635323393), que nunha publicación en Twitter afirmou que “Non podemos calar diante do machismo, da tribialización da violencia contra as mulleres, sexa cal sexa o seu xeito de manifestarse. O silenzo fainos cómplices, parabéns a Xoán Reices e ao @bngdaestrada por non manterse á marxe.”
Tamén a conta oficial da organización nacionalista publicou un tuit de apoio a Xoán Reices, así como a toda a militancia do BNG na Estrada (https://twitter.com/obloque/status/1610176483065995264).