― A directora xeral de Emprendemento e Apoio ao Emprego, Margarita Ardao, destacou no acto os valores que promove a economía social e a aposta do Goberno galego polo emprendemento a través da rede de polos
― A Xunta fará entrega ao longo das vindeiras semanas dos galardóns ao resto de colexios, institutos e centros de formación profesional e de ensinanzas de réxime especial premiados
― Na edición de 2023 recoñécense os traballos dos centros CPR Plurilingüe Luis Vives de Ourense, CEIP de Domaio en Moaña, CEIP San Miguel de Reinante en Barreiros, IES A Guía de Vigo, CEIP Pintor Antonio Fernández de Goián, en Tomiño, e da sociedade cooperativa galega Mendiño, ademais do IES Valadares
A Xunta iniciou hoxe no IES de Valadares de Vigo a entrega dos premios da edición 2023 do certame Cooperativismo no ensino co que a Consellería de Promoción do Emprego e Igualdade busca difundir e promover o cooperativismo entre o alumnado dos centros de educación infantil, primaria, secundaria, educación especial, formación profesional e ensinanzas de réxime especial de Galicia, impulsando a realización de actividades de fomento do cooperativismo nos centros educativos.
Catro colexios, dous institutos e o alumnado dunha sociedade cooperativa galega foron recoñecidos neste 2023 cos premios deste programa da Consellería de Promoción do Emprego e Igualdade, tal e como publicou onte o Diario Oficial de Galicia (DOG).
A directora xeral de Emprendemento e Apoio ao Emprego, Margarita Ardao, participou na entrega do premio ao IES de Valadares, un acto no que salientou a aposta da Xunta polo emprendemento a través da Rede de polos de emprendemento e apoio ao emprego e os valores da economía social. O evento, tras a intervención de Ardao, rematou cun concerto de Sofía Espiñeira, música e tamén actriz de teatro e circo.
O instituto de Vigo gañou co EcoValadares: sociedade cooperativa xuvenil galega de Valadares o primeiro premio ao mellor traballo na modalidade de actividades cooperativizadas, dirixida ao alumnado dos centros de educación secundaria obrigatoria e educación especial. A través desta iniciativa deseñaron unha cooperativa xuvenil co obxectivo de que o instituto se transformase nun ecocentro para acadar un consumo enerxético e de material funxible responsable, así como os coñecementos necesarios para tomar conciencia do que está a acontecer e facer previsións dun futuro mellor.
Nesta mesma categoría recibiu un accésit Vivindo do conto do CPR Plurilingüe Luis Vives de Ourense.
Modalidade actividades artísticas
O certame Cooperativismo no ensino inclúe outras dúas modalidades máis. Na de actividades artísticas, dirixida ao alumnado dos centros de educación infantil, primaria e educación especial, establécense catro categorías. Na primeira, para o alumnado de segundo ciclo de educación infantil, gañou o premio ao mellor traballo o CEIP Plurilingüe Domaio, de Moaña, con Todo funciona se cooperamos. O accésit foi para o CEIP Pintor Antonio Fernández de Goián, enTomiño, por O clan dos superheroes e heroínas.
Na categoría para o alumnado de primeiro e segundo de educación primaria resultou premiado o CEIP Plurilingüe Domaio, de Moaña, con Xogamos xuntos por un mundo cooperativo; e o accésit recaeu no CEIP San Miguel de Reinante, en Barreiros, por Cooperaglú. A terceira das categorías desta modalidade vai destinada ao alumnado de terceiro e cuarto de educación primaria. O galardón ao mellor traballo foi para o CEIP San Miguel de Reinante de Barreiros por Cooperación triunfo; e o CEIP Plurilingüe Domaio, de Moaña, recibiu o accésit por Cooperar ao son das ondas. Na última das categorías, para o alumnado de quinto e sexto de educación primaria, resultou gañador tamén o CEIP Plurilingüe Domaio, de Moaña, por A cooperación une xeracións; e o accésit foi para o CEIP San Miguel de Reinante, de Barreiros, por Cooperegueifa.
Proxectos empresariais
A terceira das modalidades do concurso que convoca a Xunta cada ano está dirixida a premiar os proxectos empresariais cooperativos feitos polo alumnado dos centros de formación profesional e de ensinanzas de réxime especial. En 2023 resultou gañador nesta modalidade o IES A Guía, de Vigo, por Holística, sociedade cooperativa galega. O accésit recaeu en Sail2day, presentado polas alumnas e alumnos da sociedade cooperativa galega Mendiño, de Vigo.
A entrega destes galardóns é unha actividade previa á celebración do Día do Cooperativismo Galego que se celebrará o 1 de xullo nas instalacións da cooperativa Agroflor, en Narón. Dentro desta programación tamén se están a celebrar os Venres Cooperativos, visitas abertas á cidadanía para que coñeza entidades de economía social sitas nas catro provincias que se organizaron a través da Rede de polos de emprendemento e apoio ao emprego, en colaboración co Consello Galego de Cooperativas, órgano consultivo no que están representados administracións, institucións e entidades.
