– A xornada, que reuniu a 23 participantes, abordou o impacto psicolóxico da atención continuada e o coidado da pel no ámbito domiciliario
- – A iniciativa consolídase como un espazo de formación e apoio práctico para profesionais e familias no eido da dependencia
O Edificio Multiusos de Moraña acolleu na tarde de onte a segunda sesión do programa Concoidado, unha iniciativa orientada a formar, acompañar e dotar de ferramentas prácticas tanto a familiares coidadores como a profesionais do ámbito da dependencia. O encontro, no que participaron 23 persoas, centrouse en dous piares esenciais para a calidade de vida no ámbito domiciliario: a saúde física e emocional de quen coida e o coidado integral da pel das persoas con mobilidade reducida ou dependente.
A xornada iniciouse coa intervención de Ana Belén Tajes Méndez, enfermeira, psicóloga e actualmente matrona no Centro de Saúde Virxe da Peregrina. Tajes centrou a súa intervención no autocoidado das persoas coidadoras, un aspecto frecuentemente invisibilizado na atención continuada. Durante a súa exposición, profundou no impacto psicolóxico do coidado prolongado, nos sinais de sobrecarga ou desgaste emocional e na necesidade indispensable de establecer límites, buscar espazos de respiro e coidar a propia saúde para poder seguir coidando de xeito sostible.
Pola súa banda, Ana García Fernández, enfermeira do Centro de Saúde de Moraña e profesional referente en feridas do Servizo Galego de Saúde (Sergas), abordou de forma práctica e técnica a prevención de lesións cutáneas asociadas á dependencia e o coidado integral da pel. Na súa intervención, detallou pautas concretas para evitar a aparición de úlceras por presión e lesións por humidade, facendo especial fincapé na hixiene adecuada, a hidratación, os cambios posturais programados e a selección axeitada de produtos de barreira e protección.
Coa celebración desta segunda sesión, o programa Concoidado consolida o seu obxectivo de ser un punto de encontro e aprendizaxe para a comunidade, achegando o coñecemento e a experiencia dos profesionais de Atención Primaria ás realidades cotiás dos fogares de Moraña.
