Os traballos contan cun orzamento de 48.456,43 euros, e suporán a remodelación integral da zona de xogos emprazada no barrio da Cuña
“Cumprimos a palabra dada hai un mes, cando anunciamos o Plan de Mellora dos Parques Infantís -70 en toda a cidade e perímetro rural-, e o que hoxe comeza é o primeiro dos 10 parques que serán rehabilitados ata final de ano”, sinala o concelleiro de Medio Ambiente, Jorge Pumar
Esta mañá comezaron as obras de rehabilitación e reforma integral do parque infantil da rúa Doutor Peña Rey, no barrio da Cuña, e que suporán un investimento de 48.456,43 euros.
Esta actuación é a primeira que se pon en marcha dentro do Plan de Mellora de Parques Infantís que ten planificado o Concello de Ourense a través da Concellería de Medio Ambiente e que supón un investimento global de 8 millóns de euros para a mellora integral de 70 parques e zonas infantís de toda a cidade e do perímetro rural.
“Cumprimos coa palabra dada hai un mes, cando anunciamos o Plan de Mellora dos Parques Infantís, e o que hoxe comeza é o primeiro dos 10 parques que serán rehabilitados ata final de ano”, sinala o concelleiro de Medio Ambiente, Jorge Pumar. “O propósito que temos é avanzar coas diferentes fases e actuacións previstas e atendendo así ás demandas que nos trasladan os veciños e as familias de Ourense”.
Así, o concelleiro explica que o plan foi elaborado seguindo varias liñas principais de traballo:
Mellora da seguridade dos parques para os nenos
Innovación nos novos xogos para un maior goce dos nenos e nenas no lecer ao aire libre
Incorporación de xogos accesibles para a creación de novas zonas de integración para tentar dar resposta ás necesidades dos nenos con diversidade funcional
Sosteñibilidade da contorna dos parques infantís para un maior goce do conxunto das familias dos parques
Adaptación das instalacións á climatoloxía da cidade