· Cabezas afirma que durante a conversación con Paco Rodríguez puido comprobar que “ambos compartimos plenamente que a situación vivida no Concello durante estes últimos anos non pode volver repetirse e, por tanto, estamos absolutamente de acordo en poñerlle fin o próximo 17 de xuño”
· A confianza maioritaria da cidadanía avala esta postura, sinala Manuel Cabezas, “pois entre PP, PSOE e BNG sumamos 17 concelleiros, sete dos cales pertencen á segunda lista máis votada, o Partido Popular, e por tanto maioritaria das tres”.
· “Que vai facer o BNG”, pregúntase o candidato popular, quen advirte da necesidade dun novo goberno local: “Só espero que sexan consecuentes e cumpran co que din: mirar ao futuro”
O candidato á alcaldía de Ourense polo Partido Popular, Manuel Cabezas, pide ao BNG “que manifeste se está disposto a poñer fin á situación de emerxencia que vive Ourense ou vai permitir que siga gobernando Democracia Ourensá”.
Manuel Cabezas lanza esta mensaxe tras manter un primeiro contacto co líder da candidatura socialista, Paco Rodríguez, durante o que analizaron as posibilidades de pacto tras os resultados electorais do pasado 28 de maio.
“Ambos compartimos plenamente que a situación vivida no Concello de Ourense durante estes últimos anos non pode volver repetirse e, por tanto, estamos absolutamente de acordo en poñerlle fin o próximo 17 de xuño”, afirma o candidato popular.
Manuel Cabezas asegura ser consecuente co devandito durante a campaña: “No caso de non haber maiorías suficientes, PP, PSOE e BNG deberían explorar posibles vías de acordo”. Agora, incide, “tanto Paco Rodríguez como eu temos a firme vontade de cumprir co que dixemos no seu día, pero que vai facer o BNG”, pregúntase o candidato popular, que lembra a Luís Seara as súas palabras, que coinciden coas tamén pronunciadas por Cabezas: “estamos nunha situación de emerxencia social e política”.
Se é así como ve a cidade o BNG “só espero que sexan consecuentes e cumpran co que din: mirar ao futuro”, di Cabezas, quen apela á necesidade dun novo goberno local “para non defraudar a vontade maioritaria de cambio expresada polos ourensáns que votaron ao PP, PSOE e BNG”.
O PACTO CON DEMOCRACIA OURENSÁ “NON SE VOLVERÁ A DAR”
Lembrou Manuel Cabezas que nada máis chegar á presidencia da xunta local do PP de Ourense, en xullo de 2022, “ordenei a ruptura do pacto con Democracia Ourensá”. Desde entón e reiteradamente, mesmo durante toda a campaña electoral, “manifestei que ese pacto nunca se volvería a dar e iso é o que manteño”. Unha posición idéntica á manifestada polo propio candidato socialista, sinala tamén Cabezas, “que dixo que nunca fará alcalde a Jácome”.
A confianza maioritaria da cidadanía avala esta postura, sinala Manuel Cabezas, “pois entre PP, PSOE e BNG sumamos 17 concelleiros, sete dos cales pertencen á segunda lista máis votada, o Partido Popular, e por tanto maioritaria das tres”.
